يانفس مدي حبل وصلك مع الله كلمات نبعت من القلب لتصل الي القلب

للشاعرة ريوف الشمري عضوة رابطة حياتي دعوة



يا نفس مدي حبل وصلك معَ الله -=- لا تقطعي يا نفس حبل الرجـاوي

سيري و قولي للشقـا و المعانـاه -=- اللْه على كل شي قادر و قـاوي

لامن هقينـا فيـه خيـرٍ لقينـاه -=- دايم و ربي عند حسـن الهقـاوي

تذكري عفوه و جـوده و يمنـاه -=- تذكري دايـم عظيـم العطـاوي

يا نفس من هو طاوعك ضلّ مسعاه -=- عبدك و عبد النفس ضايع و غاوي

لو أتركك من دون ردعٍ و منهـاه -=- بالعون خضتي بي ظـلام المهـاوي

بقسى عليك و قسوتي فيـك للَـه -=- أخشى تمدي للجحيـم الخطـاوي

في قسوتي لك خير فوزٍ و منجـاه -=- و لوما الغلا ما كان قلبي قسـاوي

هدّي جموحك عيني الذنب عنّـاه -=- يكفي ترى مليت منك الشكـاوي

رجلي عنا من طول الأسفار ماطاه -=- وش له تزيدين المسافـر عنـاوي

يا نفس باكر نحصد اللي زرعنـاه -=- صبرك معي باكر تزيـن الغنـاوي

لا تَشْري الدنيا لو الحسن غطّـاه -=- نعيمها لو طال فانـي و ضـاوي

شدّي عن أرضٍ ريحة الهـم تمـلاه -=- خلينا بأرض السعد نسكن و ناوي

وش لك بدنيا الياس و (الحي) دنياه -=- فيها الرجا معَ القلوب متخـاوي

لا تغترب يا نفس رجلي بممشـاه -=- درب السعاده بيّـنٍ و متسـاوي

خلي دروبٍ ضيعت رجل من جاه -=- عوجٍ و ماشيها غريـبٍ خـلاوي

يا رب قلبي حمل الأيـام خـاواه -=- جيتك و أنا قلبي بحملـه شقـاوي

جيتك و نفسي تطلب بقربك دواه -=- و أنا أشهد إنك للنفوس المـداوي